| News | |||
|---|---|---|---|
| Fasnachtsumzug | |||
Nebelkrähe |
|||
| Narr vo Sangalle | |||
D’Alliglattohre
|
|||
grüezi mitenand – entschuldiged si, dass ich do e so ineplatze und eu muess underbreche
fögeli isch min name – fögeli mit f wie fehler – jo und weg emene fehler bin ich ebe au do jo und zwor wegeme fehler bi de volkszählig . ehr wüssed jo, dass me sit neueschtem die volkszählig all johr muess dörefüehre, devör chan me sie jetzt aber au übers internet mache und jetzt isch das nöd e so nett gsi: alli date sind fort, weg, mattschiebe und drom isch denn d’ kathrin hilber – nöd ehr kenned si alli – d’regierigsrötin wo chefin vom kantonale departement des innern isch und ebe au mini chefin wo denn ebe zo mer cho isch und gseit het:
fögeli – wenn sies seit weiss me nie recht öb sie würkli en f wie fehler ninnt - lömmers - fögeli het sie gseit: gang a d’fasnacht und hol döt die date wieder! a de fasnacht sind fascht alli st.galler i de beize, do chömemer statistisch ziemlich gnau ane und s’problem vom dateschutz isch au glöst, nöd, sind jo alli guet verkleidet, me kennt niemert –
geled sie frau „ „ freut mi, fögel
also frau „ „ punkto dateschutz mönd si überhaupt kei angscht ha, jo und a de fasnacht isch sowieso alles alkoholisiert – äh noch de fasnacht wird sowieso alles anonymisiert und zudem sind sie jo guet verchleidet frau „ „, nei hetted ehr denkt, dass das d’ frau „ „ isch, nei, also, gsehnd si frau „ „ si chönd beruhiget mitmache und jetzt scho herzliche dank im name vo de frau hilber - e kantonsschöckeli mit em neue wappe, jo
de kanton heg schints e neus
wappe – alli drucker freus
au gsoa heg de sege geh
well us de stritaxt jupijeh
jetzt neu es bieli worden isch
so dass d’armee fascht abgschafft isch
doch schints heg jetz d’svp
gseit me söll nöd s’neui neh
denn jetze wo de schutz vor waffe
abglehnt seg währed mer affe
nei jetz chön meh jupijeh
wieder s’alti mit de stritaxt neh!
jo drucker wörs nomol freue
aber mi de stutz nomol reue!
jo isch doch wohr, vör da hends denn geld, aber vör üs staatsbeamti? hä? sparpaket und nöd eis nei zwei – zom devolaufe, do het d’sp scho recht ka! nei zersch verspricht me eim e inkontinenzentschädigung – äh inkonvenientsentschädigung, bim andere wüsst i wenigschtens was es bedütet – nei chasch jetz vergässe au kei kein längere vaterschaftsurlaub, do wird au nünt nütze wenn me de kantonsröt wör pflaschterstei schicke: en stei im brett nützt nünt, wenn s’brett vorem chopf isch! nei sparpaket und gliechzit heissts: fögeli gang a d’fasnacht go schaffe und wenn denn gosch leg denn e flüge a – weisch e so eini wie de longchamp amel a het, denn wirkt die umfrog sofort glaubhafter – jo i ha sie denn nöd gfroget, öb ich i dem fall die umfrog gad scho vo afang a chön dihei mache denn ehr wüssed jo
öb minarett öb waffeschutz
falschi prognose - gottfried stutz
de longchamp vo de gfs
vozellt üs eimol me en chäs.
schamlos tuet ers volk betrüge
do hilft üs au nöd sini flüge
nei, wenn die hilft denn nu allefalls
geg sin und nöd üsen dicke hals
denn sini zahle die trülled schneller
als d’flügel vo sine bunte propeller.
zerscht uf grüe und denn uf rot
de longchamp schüsst es bärli z’tot
scho veruckt, debi hend sich jo d’gegner vo dere initiative selber abgschosse:
während de reimann warnt: männer hört her
fehlt uns im schrank das sturmgewehr
dann fallen die einbrecher über uns her
seit d’andres doch gliechzitig im milde ton
ich schwör eu bim heilige lampion.
s’gwehr isch kei gfohr ohni munition
und trotzdem s’isch doch kum zom fasse
wött im schrank doch s’mehr von de masse
lieber s’gwehr als alli tasse
jo und freu hends ka, die sieger! jo
de jakob büchler cvp
hockt strahlend uf sim canapee
innig umarmt er sini brut
nöd d’helen, nöd d’vreni, nöd d’ursi nöd d’ruth
nei mit sim gwehr posiert er verzückt
nebed sim christbaum wunderbar gschmückt
und er freut sich mit em chind und em heilige paar
mit de hirte em ochs und de engelschar
dass er de nationalrot cvp
au nögscht johr sim christbaum törf fürschutz geh!
und well vo dem no nöd dred gsi isch
nimm ich a dass de büchler de esel isch
guet aber löndmers, d’flüge het mi uf abwege brocht – kei wunder – nei i söt afange zehle, zerscht emol gohts um en überblick:
eis zwei drü vier füf sechs siebe
im kanton do wird viel gschriebe
im kanton do wird viel zellt
damit am schluss kein bürger fehlt
s’gschlecht vom wohnort a de geburt
chrüchsch a d’arbet oder machsch en spurt
d’heimat und d’sproch vo de konfession
bisch dini frau, din vater din sohn
d’stellig im bruef und bim verchehr
eimol zweimol, hin und her
jo und mi nämts au no wunder
för was nützt üs all de plunder.
aber eigentlich het mich da jo nöd wunder zneh – ich bi jo nu en beamte– und en beamte froget nöd, de macht – jo und d’fdp entscheidet nochher denn öb das den en überflüssige bürokratismus gsi isch – oder nöd – jo aus liebe zur schweiz – jo und ich mach jetz witer – aus liebe zur kathrin äh zum kanton! – jo aber apropos kathrin, da mon i jetz aber gliech no no säge: die het sofort gwüsst, wo üseri date sind, nöd die het no alli date uf de platte und sie het gseit: fögeli – wikileaks - aber mer lönd üs nöd erpresse, fögeli, du holsch die date zrugg, jo liechter gseit als gmacht, denn de assange isch jo bekanntlich nöd ganz e so frei verfüegbar, jo genau wie üsen kachelma
de julien und de jörgeli
ploged di glieche sörgeli
die beide hend doch würkli glaubt
uschuldig wird wer en uschuld raubt!
jo, das sind doch au zwei richtigi beamte: nöd froge, nu mache, nu dass bi dene si sich nochher nöd froged was gmacht hend, sondern d’ richter – jo
de julien de datejäger
benützt cd’s als dateträger
geeignet sind - laut wikileaks
au chlini rundi memorysticks
de jörg hingege, de wetterschlecker
seit sicheri speicher hend kein stecker
und drum ladt üsen wetterhüpfer
sini datesamlig under en lederschlüpfer
und vergisst i sinnere euphorie
das en tampon au chan en memorystick si.
jo und ebe well de assange nöd frei verfüegbar isch, bin ich jetzt do und mösst jetzt no noch em überblick no e chli is detail goh. do wer emol die sache mit der sprache: ich mösst no wüsse welches ist ihre hauptsprache, das heisst die sprache in der sie denken – oder för die wos sich das nöd gwöhnt sind - die sie am besten beherrschen: jo und um usezfinde, öb si dütsch chönd und au verschtönd, möst ich en chline sprochtescht mache – hät de herr blocher gseit – und uswähle söll ich d’lüt noch em zuefallsprinzip - het d’frau hilber gseit, also vangemer a:
ohni helm und ohni hüetli
goht de fehr is albisgüetli
chunt er wieder hei
het er en verschlagne stei
piff paff puff
s’git eis uf d’nuss
nuss isch kein wort
du gisch d’antwort
und die frage lautet: heisst es
schweizer wählen svp
oder
schweizer quälen svp - oder umgekehrt?
au ohni helm und ohni hüetli
goht michelin is albisguetli
doch de calmy rai
gends keis uf de stei
piff paff puff
s’git ehr und redlich keis uf d’nuss
nuss isch kein wort
du gisch d’antwort
und die frage lautet: heisst es
die linke weiss nicht, was die rechte tut
oder
die linke weiss nicht, was der rechten gut tut
ene mise müller
der hinterbänklerbrüller
kaum macht der zottel meck meck meck
schon ist der müller weg weg weg
eis zwei geissebolle
bi der chum i go d’antwort hole
und die frage lautet: heisst es
das schleckt keine geiss weg
oder
den hat eine geiss weggeschleckt?
jo genau (schöckeli geben) den hat eine geiss weggeschleckt:
de müller goht zor svp
lest i de zitig d’cvp
jetz isch sin körper au debi
de chopf isch jo scho lang döt gsi
de toni öffnet gern sin stall seit thomas, s’wär doch zom lache
wenn ich i dim spezielle fall nöd wör e usnahm mache
und drum lon ich es isch doch klar seit er mit heitrer mine
för eimol zo de brunä schöf es schwarzes schöfli ine
jo de müller isch en knüller, wobi, d’cvp hets abgseh
vom fehlende geld und em verlorne nationalrotssitz
eigentlich gar nöd es so ugern gseh, dass er
gwechslet het:
es seit de christoph darbelay
zur svp: ehr chönd en neh
jo sicher denn zom zottel
passt de doch beschtens
drom säged mer er söll doch goh
im grundgnoh sind mehr sogar froh
mer findets eigentlich sehr nett
dass er sich selber usgschafft het.
jo, aber eis moni scho no säge, bevor i witermach.
wo de müller no präsident gsi isch vom fc st. galle,
do isch no öpis glaufe – ha meischterfir und so
aber hüt?
de fc st. galle es isch doch en hohn
wött zerscht viel geld vo stadt und kanton
und kumm säget die: nei es git kei
hends geld und chaufed spieler eins zwei
nei no viel meh am schluss sinds sex
dezue mit em stübi, em peischl zwei ex
agstellti jo me seit halt so segs
im fuessballsport
und als erschte mo denn de trainer fort
wo meint: ach wie schlecht dass jeder weiss
dass ich uli forte heiss.
guet aber jetz witer i bi jo nöd förs schnorre zahlt,
sondern gar nöd aber gliech mehr chämde no zo
de letschte frog bezüglich de sproch:
eis zwei
wenn d’volkspartei
drü vier
mit em geissetier
siebe acht
en lehrplan macht
elf zwölf
isch de för d’füchs
komisch –aber
nei bitte i cha nünt defüer
de text de isch vom doktor schlüer.
jo und übrigens au de schluss:
chunsch du nöd druss
gits eis uf d’nuss
d’nuss isch zart
de lehrer hart
gib mehr d’antwort
und süsch mosch fort
nei da chasch nöd bruche, und zudem das mit de
nuss hemmer doch bim fehr scho ka, aber
vielliecht isch jo dacgar kein zuefall – aber chömed
mer doch zersch zo de frog und do mon ich si
vorwarne!
denn wenns falsch isch gits e tatze
seit de doktor mit de glatze!
denn die nützt, meint au de fehr
richtig eingesetzt viel mehr
als die besten psychologen
ja das sei gar nicht gelogen,
denn fehr habe das studiert
und als lehrer ausprobiert
doch was hans lehrt lernt das hänschen
schneller doch als ein schimpänschen
und so wird dann hans kopiert
vom hänschen hanses kopf poliert
und hänschen spricht: los hans en kater
hilft dir meh als füf psychiater.
also, ufpasse die frage lautet:
hends si lieber en ohrfiege oder füf psychiater –
nei spass beiseite: heisst es:
ein leerer plan ist kein lehrplan
oder
ein lehrplan ist kein leerer plan
witer mer möd e chli pressiere, was no fehlt isch die
stellung im beruf! guet mon ich das nöd z’italie mache!
– nei si lached jetz, aber wa machsch, wenn em
berlusconi sin zedel mosch usfülle? hä, und du
chasch niene bunga bunga achrüzle und
beschreiben sie es
näher, wötsch jo au nöd gad, nei do langed mer
üsen skistar dä walliser silvan zurbrigge
tuet uf sine latte über d’kamelbüggel ritte
und wendig elegant um torpföschte wädle
stilsicher und - ganz ohni i z’fädle
doch de zurbrigge tuet ebe au gern – viellicht au guet
das was sich uf sin name reime tuet
und wenn denn das kamel zwei büggel erblickt
so gspürt er wies en in de hüfte zwickt
denn setzt er a zomene sprung zomene ritt
aber nöd uf de latte – sondern mit
de tor gseht zwei pföschte, zielt dezwüschet und fädlet
i – mit dem wo de hund wädlet.
jo und jetzt: was ist ihre stellung im beruf. guet das isch
sowieso e chli e heikli frog, die mach i viellicht gschieder
nöd doh, do holi mer d’antworte usem facebook, isch
eifacher oder denn gang ich echli go zugfahre und los
döt alli handygspröch, denn bin ich au ideckt. jo dodemit
wäre mer bi de verkehrsmittel, die sie normalerweise
während desselben tages für einen hinweg zum
arbeitsort benützen. wie sie zruggchömed interessiert
anscheinend nöd, hauptsach si gönd go schaffe. jo die
frog chömer glob sowieso vergässe denn
als wird türer im verchehr
d’leuthard machts de pendler schwer
denn vör d’autobahnvignette
sie das doppelte gern hätte
s’ choschted meh au uf de schine
selbscht e fahrt als ölsardine
aber das isch alls no nüt
losed, z’züri liebi lüt
macht mes jetz scho dene schwer
wo no nöd sind im verchehr
jo döt wird scho s’warte tür
döt zahled d’dirne standgebühr!
zum glück han ich, seg ich zum schätzli
bi der es gratis liegeplätzli
jo bi dene prise vermags nu no de pascht zom go reise:
e papscht goht uf england, ehr hends gseh -
innere lange wisse chutte
die deckt de chile alles zue, und em papscht sini
bei - di blutte
useluege tönd nu d’schueh und die, es seg kei
wunder
sind rot und zwor wells eben au no gsehnd was
abgoht drunder
das säg nöd ich nei ganz erbost in england
d’demonstrante
si klaged a und forderet meh schutz för
d’ministrante
denn wenn de ma us rom s’kondom erlaubt,
seg das zwor nett
doch s’nützi nünt em ministrant, well er kei
platz drin het.
jo vermöge wör es wohl, s’reise, aber öb er no luscht
heg –wie dem auch sei, mer chönd zit spare, bi dene
prise chunt do sowieso nu no zu fuss, trottinett,
skateboard, rollschuhe oder velo in frog – iverstande?
guet danke, anderi meinige, danke da hemmer schnell
ka und witer gängs no um de lohn aber das mon ich
glaub uf die nöchschti beiz verschiebe, bi jo gspannt uf
d’resultat, nöd da isch au kei eifachi frog, vor allem
wenns denn um d’boni und di andere nebedikomme
goht, jo
amadu und temarii
sacked fifa - fränkli i
de blatter sepp ganz ungeniert
meint mit öl laufts doch wie gschmiert
sogar de moritz leueberger
macht diesbezüglich de sp ärger
de marty dick seit im kosovo
gebs lüt die seged dank nierli froh
und au bim berlusconi
gits ganz bestimmt nünt ohni
dass öppis gisch -
segs ufem oder underem chuchitisch
und wenn den de no gratis isch
well du verwandt mit em oehler bisch
denn nähmt en au, swär mehr doch scheiss
wenn ich devör den oehler heiss.
nu eine meint - drom chan ers vergesse
me chäm öpis über - mit nünt fresse.
nei rappaz los, mosch öpis büte
gang i din stall stopf döt e tüte
gib si em richter und denn eins zwei drei
de richter isch - und du chasch high.
jo und ich gang au ich danken ine im name vo de
kathrin hilber vör ehres verständnis und ihri
bereitschaft zom de fehler wieder guetzmache,
bis zom nögschte mol schöne obig!