Im Gmeindrot, tschuldigung im Parlament
Isch i dem Johr en chline dicke Präsident
Politik tuet zwor öpä öpis zämedichte
Mit Reime chasch döt aber nünt verrichte
Im Gegesatz zo em er werdets gseh
Chönd mer eu als Fenschterbotzer di rechti Klarsicht geh

D’Migros schluckt de Denner
So hend’s Alkohol för ali Penner

Chlöschti
A de Spitze im Vatikan do hockt en Bayer
Er trinkt döt lieber es Mass als en Zweier
De Zünd und de Kurer het das schnell bewoge
Und hends Schüga Bier noch Rom iigfloge
Jetzt hocket de Mäder mit em Papa Razzi
Bimene Bier so wie de Jud und de Gian Bazzi
Au d’ Gardischte trinked jetzt es Chlöschti
Selbverständli zonere echte Schwizer Röschti
Bösi Zunge behaupted jetzte scho
S’Chlöschti werd im Vatikan neu als Messwie gnoh

De Papst nimmt s’Chlöschti jetzt zom Taufe
Drom cha d’Schüga s’Bier als Wiehwasser verchaufe

Muskle
d’Oeschtricher Schifahrer fahred hene ane
da vor allem bi de siegverwöhnte Manne
De Schwarzenegger schiesst das grausig a
Packt selber d’Schi und trainiert „for Austria“
Wills em Meier, Walchhofer und Strobel bewiese
Das es brucht no me anabolischi Muskelriese
brecht sich däbi de Haxe und brucht jetzt Krücke
zeigts eimol meh, zwösched sine Muskle hets no Lücke

E paar Medallie und scho tömmer juble
Gwönneds nöd, denn sind ali Tuble
Kein Schnee vom Bodensee bis Matterhorn
Streuet drom Kunschtdünger am Lauberhorn

Rücktritt
Zroggtrete Holenstein, Weigelt, Walker und de Deiss
Em Joe Ackermann werds au langsam z’heiss
De Stoiber öber d’Pauli spitzlet
Öber de Busch wird jo scho immer gwitzlet
Drom verloht de Toni Blair jetzt au de Muet
Au de Schüssel het müese neh sin Huet
De Pluto kein Planet me isch, denn er isch z’chli
Drom werd de Berlusconi au nümm si debie
Bim Blocher mömer leider no chli warte
De Wahlkampf-Toni brucht en no als Geissbock in Murers Garte

Trotz Kinderuni und anderem Firlefanz
S’letsch mol sin Seich useloh het au de Jäger Franz
D’Hillary het uf Präsidentschaft Apetit
De Bill het för d’Monika Levinski drom meh Zit

Schulbehördenorganisation
D’Schuelreform schriebt de Kanton üs vor
Mer hend druf gwarte scho einigi Johr
Pfalz isch scho immer schwerfällig gsi
Denn de Stöck isch döt scho viel z’lang däbie
Jetzt will de Crottogini de Schuelrot striche loh
S’Volk seit drom ganz knapp jo zor SBO
S’Ganz mue d’Eberhard jetzt schnell umsetzte
Denn d’Lehrer sind bereits am Messer wetze
Und Wenn das d’Barbara nöd cha richtig bögle
Cha sie zo erem Franz uf Zöri zögle

Wellness
In Bern renoviereds s’Bundeshus
Die ganze Röt zögled noch Flims Waldhuus
A 1.Stell döt Wellness stoht
De Ineichen ganz sexy vor Press anestoht
D’Fässler und de Walker hend vom Wandere herti Wade
D’SVP goht eimol meh go bade
trotz Bergbure isch de Bigger wie immer verdateret
Sini Hühner sicher 10 mol gschieder gageret
Mit Rumantsch het üsen Toni kei grossi Sörgeli
Er schnorred jo sowiso nor s’Chuderwelsch vom Mörgeli

De Brunner wör au gern uf Bern
Denn er hät Wellness au ganz gern

Kollegialität
Im Bundesrot isch alles klar
Komunikation lauft wunderbar
De Blocher seit halt immer was er denkt
De Schmid Panzer noch Pakistan nöd verschenkt
Verschrottet sie lieber zo Altmetall, viel z’tür
D’SVP will trotzdem spare Bundsstür
Vom Cuochpin hört mer nünt, isch denn dä no do
De Merz de hüetet d’Chölä, da mue mer em scho loh
De Moritz de staggelt sich durchs Präsidiale Johr
D’Calmy Rey prescht weltwiit mit erer eigne Meinig vor
Au d’Leuthard will zeige eri Kraft und isch nöd taub
Sie schickt die 5 Zwerg in Vaterschaftsurlaub

5 Zwerg in Bern die ganz Schwiz lacht
Fraue ghöret döt a d’Macht
De Blocher wär doch ohni sini Frau
Nor en chline Zwerg und halb so schlau