Schnitzelbängg

Katholike händ alli ä mail überchoo
Familieplanig sig nüme tabu
Wenn Vati-kan(n) – und Mutti will
und sie nimmt im Moment kei Pill
chasch jetzt – und das mit guetem Gwüsse
ä Kondom us Rom benutze zom di schütze

zerscht sinds schwanger, denn wird gebore
eri Unschuld händs scho längschtens verlore
mer goht au nüme go schaffe, halted Hof
ä Schuel isch au scho gfunde för dä chli Goof
mer redet nöd vo dä Simpsons oder sösch emene Gloon
mer redet vom David und em Elton John

Alterschrankheite mached au vor Politiker nöd Halt
die chas au treffe --- plötzlich und chalt
dä Rorschacher Müller hät vergesse zu welere Partei er ghört
dä Blocher hät mit siner Ussag d’Luxeburger empört
dem seit mer bim Müller: Alter-Demenz
und bim Blocher: verbale Inkontinenz

wäg sim private Mailänder-Puff
isch jetzt sogar dä Vatikan uf dä Berlusconi muff
trotz igsetzte Hoor und Falte glätte
trotz Viagra schlucke und Zäh ersetze
sini SEX-Eskapade sind scho fascht infantil
das hät au en Name: Alters-senil

sgit en Huufe Billigangebot för Ferieflüg
chasch überall ane, s’choschtet fascht nüüt
mer jettet fröhlich umenand
als wär dä Klimawandel nöd bekannt
Franzose sind eidütig a dä Sprötze – vo Isicht kei Spur
döt flüüged sogar di Fahrende -----------retour

St.Galle verstickt no vor luuter spare
för en Huufe Projekt ischs en cheib Schmarre
debi wönd er eu doch gross-städtisch gee
da chamer a dä schöne Lokremise gsee
dä Finanzchef Gehrer wöt ---- und da isch nöd zom lache
us St.Gallä ä „M-Budget-Label-Stadt“ mache

bim FCSt.Galle hets wieder gstimmt mit dä Finanze
und denn git ene GC voll uf dä Ranze
jetzt goot halt sGeld sammle vo Neuem aa
sie müend nämli dringend ä Dach öber dä Fuessbalplatz haa
sösch isch döt fertig mit tschutte - chasch sStadion verschrotte
denn Glücksspiel im Freie isch nämli verbote

Örgeli- Örgeli- Örgelimaa
hät emol ä Fründin ghaa
hät sie mit em Messer gritzt
bis er i dä Chischte sitzt
Örgeli- Örgeli- Kachelmaa
jetzt seisch nüme sWetter aa

En Vegetarier wöt halt scho sicher sii
dass ---- bi dem woner ässt, kei Fleisch isch debii
also kei Muus i dä Chips, kein Frosch im Saloot
nur Gsunds und Grües ---- mer gänd eu en Root
göd drum, es tör au öppis choschte
eui Brotworscht in Zuekunft bim Gärtner go poschte

üs het mer gseit mit dem Gwehr im Chaschte
täged Manne s’Training---------„die grosse Zerlegig“-- mache
stimmt aber nöd, mer kenned ganz anderi Faktore
si hend Schiss, ohni Gwehr sig au Potenz verlore
dä bewusst Chaschte hät no en anderi Berechtigung
sie trainiered vo dem - dä Chaschtesprung