Schnitzelbängg

Armee
S’het jede Eidgenoss sis Gwehr dehei
mer zwo sind degäge und säged nei
es git nu öppis wo üs tuet entlaschte
s’Gwehr chunnt is Züghuus und de Maa chunnt in Chaschte!

Hüppi
Dä Hüppi üsän armä Tropf
mues bettle mit äm läärä Topf
dä hett halt zom die Kassä völlä
sich a die Frau Klatten machä söllä
denn gäbs zom Zahltag vom FCSG
för d‘Spieler no än BMW

Jasmin Hutter
Viel Spitzesportler meinet efäng, Doping wör sich lohne
e Sprütze do, es Zäpfli döt – bringt ene Millione
au d’Jasmin Hutter het’s probiert, doch hä-ä es isch s’lätzä
es hilft re nünt bim Denke und no weniger bim Schwätzä!

Bush
De Schueh an Grend vom Double-You Bush
gäb alleweil es Versli susch
en Vers öber dää - da tönd mer loh
da isch uf kan Fall üsers Niveau
als Schitzelbänggler lernsch im Nu
Versli öber Behinderti sind tabu!

Markt
Nu ein Gmües- und Früchtestand sölls geh
Platz hegs do för keine meh
i de neu geplante Halle
dem seit mer freie Markt z’Sanggalle!

Murer
Chumm isch de Murer Bundesroot
stellt mer sich berechtigt d’Froog
löst er sich vom Blocher echt
oder bliibt er «Ueli de Knecht»!»

Papscht
Im neuschte Film mit em Brad Pitt
verläbt de rückwärts sini Zyt
de Papscht wills au - drockt de Schalter
und landet glatt im Mittelalter!

Deutsche
A de HSG sind di Dütsche fascht e Ploog
gottverdammi jede zweit Dozent isch en Schwoob
verzell kein Seich – seg i – du chasch mi nöd verwütsche
es git doch gar nöd soviel gschiidi Dütsche

Obama
Uf de Drüweihere schnatteret d’Schwän

trotz Enteflöh bädele - yes we can

Willkomm i de Schwiz, öb Bulgar und Rumän
mer nehmed eu alli - yes we can

Die VBSG-Büs, neu und bequem
mer fahred schwarz - yes we can

Me stiiget uf, seit de Sanggaler-Fan
und alli gröölet - yes we can

Trotz Milliarde-Pleite und Finanzierigsplän
d’UBS zahlt Boni - yes we can

Mer töred fascht alles, öb guet oder blöd
nu öppis isch neu - «da dar mer nöd»

Smoke im Restaurant, so dekandent
da choschtet de Beizer s’Wirtepatent

De Stadtrot-Cozzio seit souverän:
selber tschold - yes we can

Winkeln – Pinkeln
Dä  Stadtrot hät lang diskutiert,
und chorzerhand omdisponiert
noch üsem Kurt Furgler beliebt und bekannt
werd d‘Stross bim Bundesgricht benannt
dä Krüger wicht am Dürrematt
da findet lang nöd alli glatt
verschisse tröffts d‘Bewohner z‘Winkle
dött ossä heissts jetz nuno Pinklä!

(Skandal im Sperrbezirk)
Im Weschte isch hüt Fuessball-Mätsch
und d’Winkler züchet ehren Lätsch
jetz chömed mer scho wider draa
die pisset üsi Hüser aa
vom Bahnhof her werd randaliert
de Pöbelhuufe eskaliert
s’werd gsoffe und i d’Gärte kotzt
grölet und mit Fangschrei protzt

und drinnen in der Innenstadt
stehn die Bullen sich die Füsse platt

Skandal im Sperrbezirk
Skandal im Fanbezirk
Skandal – da tönt nöd rosig!