Schnitzelbängg

Bunga-Bunga
Chonnt de Silvio hei vom Fest,
wartet sini Frau im Nest:
«Silvio, Silvio, per favore,
voglio fare di amore.»
Er winkt ab und seit druf hi:
«Du bisch jo scho achtzehni gsi!»

Lästerregel
Frogt de Kellner: «Wa dörf's si?»,
seit de Cavaliere: «E Fläsche Wy.»
Wötsch för dä au s'Richtig neh,
muesch dem en Primitivo geh.

Power to the Bauer
Chasch koche, wäsche, bügle, heue,
miste, melche? S'wör mi freue.
Bisch bodeständig und bescheide,
Chasch folge und lohsch mi entscheide?
Bringsch Mitgift, Usstüür und bisch treu?
Isch dir's gliich, wenn's biisst im Heu?
Bisch ledig und no nöd verbruucht?
Denn gang zum Fritsche: «Bauer sucht.»

Lästerregel
Bisch nüme ganz ledig und eher e Diva,
denn gohsch nöd zum Fritsche, denn
frogsch de Mike Shiva.

Schengen-Raum
D'Schwiizer Zöllner z'Lampedusa
gind de Flüchtling zwei Ragusa
und schicked's vo Italia
in Süde uf Somalia.
Worom so wiit? I find da z'viel:
Pirate git's au z'Häggeschwil!

Wahlen 2011
«Schweizer wählen SVP»,
Glücklichi halt d'CVP:
Wer guet isch, wählt diä Liberale,
und au diä Linke gönd a d'Wahle.
Zum Glück git's kei Diät-Partei,
sus wär i döt jo ganz allei.

Nachsatz
Zwei Kilo meh, da wär genial,
denn hetsch en eigni Postleitzahl.

Tja …
De Kachelfrosch hät es Problem,
bim Carl Gustav hät da System.
De Papst in Rom seit sich: «Oh Gott»
und lockeret s'Kondom-Verbot.
Und mengem Pfarrer – fassiglos –
gheit en Ministrant vom Schoss.

Albisgüetli
De Christoph rüeft is Albisgüetli,
de Fehr chonnt mit em grüene Hüetli.
Wiä jetzt so langsam döre tröpflet:
GC-Fan hend ehn verklöpflet.
Diä hend halt gmeint im erste Schock,
so grüe chäm dä vom Espenblock!

Lästerregel
Suecht d'SVP paar IT-Freaks,
denn wönd diä halt uf Wikileaks.
Blockiert de Reimann s'Internet,
isch da, will's ehm z'viel «Links» drin hät.

Windfahne
z'Rorschach hät's e Fahnestange.
Döt gsehsch e Schwiizer-Fahne hange.
Am Thomas Müller git's fast d'Krise:
Nu laui Lüftli und kei Bise.
Jetzt suecht er halt, wa wötsch no meh,
s'Luftloch bi de SVP.

Nachsatz zur C-Partei
De CVP, es isch kein Schleck
laufed alli Gschiede weg.
Sie wönd jetzt uf ganz stille Sohle
bim FC go Verstärchig hole.
Do sind's jetzt aber weisch wiä froh,
isch mit em Hüppi eine cho,
wo scho bim FC lang bewiist,
wiä me s'Rueder ome riisst
und jedi Pumpi, wö döt rennt
för d'Zuekunft e Verstärchig nennt.

Fussball WM
Qatar setzt e höchi Latte:
Wüesti, heiss, föfzg Grad im Schatte.
Ganz England meint denn au abrupt:
«Diä FIFA isch denn scho korrupt.»
Sogar de Charles, hochwohlgebore,
gwagglet wüetig mit de Ohre.
Er gspüert, i cha da guet begriiffe,
en Tinitus weg dene Pfiiffe.

Leuchtturm
Mit so vielne Richter – ghörsch de
Stadtrot skandiere –,
werd' Sangalle so richtig brilliere.
450 Gschiidi – i find da no glatt –
diä bringed Verstand und Cholle i d'Stadt.
De Scheitlin hät's checked, er bhaltet
nu d'Cholle,
und s'Hirni, da söll doch d'Regierig go hole.

Call Center
Letschti lütet s'Telefon und de Merz nimmt ab.
Es meldet sich e netti Stimm und diä froget knapp:
«Gind Sie, Herr Merz, alt Bundesrot, da wär denn scho de Clou?
Zum Bischof do, im Bistum Chur, e kurzes Interview?» –
«Jo sicher nöd, da lohn i sii, do dröber wachst jetzt Gras.
I ha nu ghört, de Huonder seg no schlimmer als de Haas.
Und öberhaupt, i frog di jetzt, wa du jo sicher weisch:
Isch dä so dick und chonnt sin Buuch vom viele Bü ... Bü … Bündnerfleisch?»

Ständerot
Me ghört so nüt, es tuet sich nüt,
es schiint mer ganz verzwickt,
wer de Kanton, im Herbst da Johr,
uf Bern is Stöckli schickt.
d'Frau Forster? Guet, i cha's verstoh,
d'Frau Keller stoht parat.
Und d'CVP, diä hät jo ein,
de David hät Format.
Und ehrlich gseit, dä isch nöd z'alt,
da isch im Fall denn wohr,
dä hät jo scho, so lang i denk,
no nöd ei wiisses Hoor.

Top of the Bundesrat
De Bundesrot, dä macht en Test:
Wa seit s'Volk, wer isch de Best?
D'Spannig churz, d'Wahl isch klar:
Ueli Muurer Superstar!
Es seg ehm glunge, seit d'Jury,
Chef vonre Armee ohni Soldate z'si!

Schluss der Diskussion
Im Parlament, im Grosse Rot,
do spared's, wa nu goht.
Eim lopft's de Huet, es langed jetzt,
wa me guet verstoht.
De Rot stimmt ab, emol isch gnueg,
d'Debatte isch verbi.
d'SP gseht rot, sie macht Protest,
da dörf jo gar nöd si.
De Gehrer hät no kurz es Wort,
aber nu no kurz.
De Präsident, de stellt ehn ab:
«Wa du seisch, isch mer schnurz.»
D'FDP, diä lütet a und froged, wiä da lauft.
Sie hetted gern da Mitteli för
de Levrat kauft.

von und zu
In Bayreuth wird zum Gartenzwerg:
Karl Theodor von Google-Berg.
Wird hoffentlich nicht krank und matt,
jetzt, wo er keinen Doktor hat.
Rücktreten, ja, weil's nun ja geht,
seit Merkel nicht mehr hinter ihm steht.

Lästerregel
Bisch vo Adel, suechsch Profil,
denn kopiersch im grosse Stil.
Wött de Toni en Dokter vo do,
denn schriibt er nöd ab, er plapperet noh.

Strenger Winter
Fehlt s'Uftau-Salz, im Fall nöd gloge,
denn schiffsch uf d'Stross im höche Boge.
Fluecht denn en Bürger, wo sich traut,
denn seisch, hegsch nu chli Iis uftaut.

Kavallerie und Indianer
z'Dütschland isch diä Droh-Methode
geg üs Schwizer us de Mode.
Au gstohlni Date vo de Banke
bringt üs nüme recht zom Wanke.
Nu öppis macht üs Sörgeli:
Kein Dütsche klaut de Mörgeli!

Handy
Chonsch vom WC, bisch nervös,
häsch nassi Füess und nassi Stöss,
denn weiss i grad, wa da bedütet,
bim Schiffe hät dis Handy glütet.

Frogt di en Tschugger uf em Land:
«Worom schiffsch eifach do a d'Wand?»
Denn seisch am Tschugger:
«Mach kei Stress.
Mis Handy hät kei GPS!»

Loht im Theater, wo's dir gfallt
en Ma ein fahre, dass es knallt,
denn frogsch i dere Situation:
«Isch da de neusti Klingelton?»

Spielt mit dim Handy, s'isch kein
Witz,
en chliine Bueb im Chindersitz,
denn isch de Gof, wo gern wör
wachse,
de Sarkozy mit z'kurze Hachse.

Geothermie
Bohrt Sangalle tüüf i d'Erde,
chönnt da jo no erdbebig werde
I bi scho froh, scho fast erregt,
wenn immerhin sich da bewegt.

Lästerregel
Wör niemert meh z'Sangalle wohne,
denn müesst me d'Lästerzunge klone.
Denn wär am Schluss no er und i,
so schö chönnt's do z'Sangalle si.